10電影節16

時光微塵 7.2
失望.....

白鬼 8.1
我唔少朋友都唔多鐘意,但自己又覺得幾好睇,不過無可否認係有少少熟口熟面.克萊雅丹妮舊年套'巴黎日和'我都好喜歡,睇怕佢可以重回我既電影版圖裡面.(佢曾有一排d戲悶到痴肺)

冧爆你恐怖舞會 6.5
成套戲冇乜橋的,只係一直大玩血淋淋既b片.不過都算有d野睇.坦白講荷李活大把賣血片都好過呢部.
不過電影節最後一場有導演在場同埋成班戲迷一齊睇戲一齊叫下,又確係幾有氣氛!

10電影節15

曾經的無產者 7.1

冇睇到郭小櫓另外果套劇情片,反而睇左呢套紀錄片,都ok;同我呢幾年睇過唔少大陸獨立製片人拍既紀錄片形式幾唔同,雖然內容都係以多線拼構結合而成一個關於年代中國社會面貌既大拼圖,但結構上比起大部分大陸作品完整得多,亦非其他多數人樌用既video diary手法.

宅配男金色搖籃曲 8.1
都唔錯, 不過真不復一首punk歌救地球當時既驚喜咯~!最後放煙花唔錯!案件到最後依然並冇完滿既解脫,呢個處理亦唔錯.

黎巴嫩 8.2
有潛艇片feel但環境更細,局部氣氛好緊湊;結尾高潮既一段,壓迫感極重,但同時又有非常脫離現實既迷離feel!而俘虜被阿拉伯基督教軍佬恐嚇一段亦處理得好好!好多人大讚既一段家庭被脅持場面,我反而覺得有少少似雷霆救兵果一幕,只係視點唔同左.

睡衣男異次元空間 6.2
雖然唔算好差,不過睇埋呢套(之前大日本人)之後只覺得松本人志有小聰明但欠大智慧,而且唔識埋尾.....講真下次未必會再特登去睇佢d戲.

切切切 7.9
雖然故事有少少呢度抄少少果度抄少少之嫌,但合拼得唔錯,加埋'泰國'特色,導演導技亦算合格有餘,所以就算劇本上唔完善但亦ok好睇.不過套戲其實係一般帶動作/暴力/血腥既變態兇案片,絶對唔係camp片,小冊子又有少少誤導....

10電影節14

蟹工船
睇左一陣,好似麻麻,所以較軚走左.....

紙花 8.1
小冊子搵'大國民'黎相提並論又係亂up廿四,套戲本身其實幾好睇,亦意外地悲情;歌舞片段比預期中少,而且同今時今日既寶萊塢製作相比算係簡潔得多.

三傻大鬧寶萊塢 8 (miss左開頭約35分鐘)
真係乜都有d,笑位好惦,歌舞ok不過冇驚喜,都算係全無冷場.

小雙俠 6.5
三池崇史慘被綁手綁腳下真係幾難全情發揮,不過都局部精彩,但亦有d位真係尷尷尬尬唔知點好....

私奔自由行 8.3
意外驚喜. 又夠騎呢又講到下野, offbeat得黎真係算係咁. 結尾高潮位爭少少, 若編排好少少就更完美....

10電影節13

春風沉醉的夜晚 8
ok啦,但始終去唔返蘇州河當年既驚為天人.

死心不息 4
Gasper Noe過份自我沉溺而失控既一部戲. 開始唔錯,直到主角死去既一段都係可觀既,可惜跟住就..... 不如改名叫'死唔斷氣'吧!

紅菱豔 8
其實以前睇過,不過大銀幕真係另一返感受. 部戲其實好主流, 米高華一向好大路, 但拍得有皮有眼, 而且舞蹈流麗動人.

淺草之燈 8.2
第一次接觸島津保次郎,又真係唔錯,亦可以從影片睇見佢對小津,成瀨,溝口等人既影響.唔知呢套會唔會係佢云云作品當中較為輕快既一部,雖然故事內容涉及迫害同埋不公平,但拍得好流暢,情節同人物亦好爽幾純真,結局雖未算皆大歡喜,但都算出人意表得黎又完滿.

10電影節12

上訪(國際版) 8.5
強. 中段有一幕好得人驚....
依家又想睇埋導演版....

殺死我阿媽 8.2
廿歲仔拍到部咁既戲出黎真係唔簡單,尤其以表面既憎恨道出母子之間深厚既情感,唔錯.

媽媽離家上班去/援交/後來
算ok喇,學生們如果睇到呢段,努力!

小山36景 3.2
悶到痴膠花....
Jane Birkin直頭係hea演,零演技....

10電影節11

金髮奇女子 Eccentricities of a Blond Hair Girl 8
幾好睇,又得意,場景既簡潔亦華麗,日興夜變化既表現好過癮,結尾亦好爽!明明係現代但d人物情節又好似係古代咁,但又唔會感覺突兀,奧利華拉真係老而堅!

兄狂歲月Brotherhood 7.7
都幾好,不過真係同斷背山有距離,唯一特別之處就係以新納綷為背景.兩個男主角有火花但爭咁少少深度,都算係咁啦.

潮爆莫斯科 Hipsters 3.2
又唔潮,又唔爆,d歌舞又唔得,笑又笑唔出,都唔知睇黎為乜....
值得一提,女主角係永遠的微笑個妹妹,現已婷婷玉立....

10電影節10

緊張大師的無間地獄 Henri-Georges Clouzot's Inferno (不能評分)

有事遲左入場,只睇左後半部. d影象真係唔錯(指'地獄'既毛片)!


廢男家族 The Misfortunates 7.9

都幾好睇,主角一家真係成班死爛鬼,係果咁既醉酒環境下長大,認真難過.....不過亦可睇到眾兄弟雖然一榻糊塗,但好團結亦算有情有義....可惜唔爭氣....


今天應該很高興 The Happiest Girl in the World 7.7
愈睇得多近年電影節既羅馬尼亞電影就愈會發現佢地真係有一套格式,就係成日都要係一個既定處境/事件加以無限伸廷,而且總係一場一場戲係咁口水玩落去,事情亦往往係愈搞愈惡搞...呢套亦唔例外,不過都尚算處理得唔錯.

驀然回望 Revisited 7
好環保既一套電影,皆因全約有1/3到1/4係舊片片段.相信未睇過佢d舊作既人,會同我一樣,有時候真係一頭霧水;加上對話中又有唔少吹水理論,靠字幕真係睇到暈....
不過對贊祿西現場俾人印象好好,好有智者風範.

山巔的呼喚 The Constant Factor 8.3
呢套舊作就真係睇到贊祿西功力所在,劇情推進有力,唔會拖戲,對當時波蘭社會情況既批判毫不手軟.可惜岩岩之前睇既'驀然回望'已收錄左唔少片段,有少少影響左整體觀感.

10電影節9

小國民尼謨
8.5
我都buy佢,不過結尾失望.....
簡直係花技招展到好似萬花筒咁,導演野心好大,故事唔算好原創,但係將好多其他電影既元素拼貼得唔錯,令人睇得興奮. (我自己睇到既有:導演自己既'小英雄杜杜','第八日', 無痛失戀, 極地戀人, 蝴蝶效應, Sliding Doors, 千年女優, 甚至奇斯洛夫斯基, 仲有唔少)
視覺上真係目不暇給. 內容上d hypertext亦真係多到近年少見.
可惜好似個洋蔥咁,即係一層一層剥開好似好複雜咁,但到最係剥晒原來係冇野....呢樣比較令人失望. 因為開頭玩到咁大, 真係一路睇, 一路心諗: 睇下你點樣收料, 點樣整個超高章既結局俾我地睇.... 點知.....
不過都非常唔錯咯!!

夏蟲結冰 Huacho 7.8
都ok既, 平平實實敘述一家人各成員既片段, 母親同阿仔兩段比較入肉, 阿婆同阿爺較為普通.

90後'乜乜'少女(都唔知邊個至係正名) Fish Tank 8.4
都幾好睇喎, 女主角做得唔錯, 部戲亦拍得寫實, 好立體咁展現出英國屋村女既困窘....果種原來全部都係假希望, 但又唔係絶望既意識唔錯......比導演上一套Red Eye進步好多.